ကောင်ကင်မှားပြီးမှောင်တဲ့ည
ပျောက်ဆုံးပါက သက်ဆိုင်သူသို့ချက်ချင်းအကြောင်းကြားပါ
ဆိုတဲ့ ကတ်ပြားတစ်ခု ရရှိခဲ့တယ်
ကတ်ပြားက်ိုကြေးမှုံနဲ့ ရင်ဘတ်မှာအသေစွဲထားလိုက်တယ်
ကတ်ပြားမပျောက်ပဲ သက်ဆိုင်သူပျောက်တဲ့အမှုအတွက်
ဘယ်ကိုအကြောင်းရပါ့မလဲ
ဗမာလိုလဲချမ်းတယ်
မွန်လိုလဲချမ်းတယ်
ဒီလိုနဲ့ခွက်ပုန်းတွေ ဖုံးမနိုင် ဖိမရပေါ်လာတော့တာပါပဲ
ကဇော်သမားလို့သတ်မှတ်မယ်ဆိုလဲ
#ချမ်း ဆိုတဲ့နာမဝိသေသနလေးတော့
ပါအောင်ထည့်ပေးပါ
အမြဲတစေပိတ်ထားတဲ့တံခါးတစ်ချပ်ကလွဲပြီး
အကာအရံမရှိတဲ့ အခန်းလေးရဲ့တံခါးရှေ့မှာ
သော့ပျောက်နေတဲ့အိမ်ရှင်တစ်ယောက်လို
ကောင်းကင်ဘုံရဲ့မလွယ်ပေါက်မှာ
ခေါင်းဝင်ပြီးကိုယ်မဆံ့ဖြစ်နေရသလိုပါပဲ
လူတွေ့အောင်ဖွက်ထားတဲ့
Activity တွေအစွမ်းပြတဲ့နေ့ဟာ
ဆာဒူကြီးရဲ့ ခြတောင်ပို့မျှင်ဝတ်ရုံကို
စကားစိမ်းခေါက်ဆိုးဆေးဆိုးပြီး
ဝတ်ရုံရမဲ့နေ့ပဲလို့
မျှော်လင့်ထားပြီးသားပါ
လေးနက်မှုတွေအကြောင်းပြောရင်
ရင်ဘတ်အောင့်လွန်းလို့
ပေါ့ပေါ့ပါးပါးပဲ ပြောပါရစေ
ငါ့မိုးကုတ်စက်ဝိုင်းမလေးရေ...
မင်းကိုငါ သေလောက်အောင် ချစ်တယ်
ပြီးတော့...
သေလောက်အောင် ရဲ့ ဟိုဘက်ကျော်သွားအောင်
လွမ်းတယ်ဟာ...
ချိုကိုဘို
No comments:
Post a Comment